'भिन्नता जिउँनुको र बाँच्नुको अर्थमा

आचार्य प्रभा ,
(अमेरिका )

म,
केवल जिउँदैछु साथी
बाँच्नुको अर्थलाई भुलेर ,
जिउँन त सबैले जिएकै छन नि ?
त र...... बाँच्न पो कठिन छ त ?
भौतिक रमझममा जिउनुको अर्थ नै
के हुन्छ र ?
सार्थक जीवन बाँच्न त
मानवीय नाता हुनु पर्छ ,
भावनाको कदर हुनु पर्छ ,
ओँठमा हाँसो फुल्नु पर्छ
त र..... मेरो बँचाइमा
लाग्छ यि सबै अल्पपरिचित भएका छन
त्यसैले....... जिउनुको आभासमा
म बँचाइको मीठास खोजी रहेछु ।
जीवनको साक्षातकारसँग समिपता बढाउन
प्रयासरत छु ,

हो...... अचेल साथी
म जिइ रहेछु ,
बाँच्नुको अभीप्शामा आफुलाई
सक्षम बनाउने कोशीश गरिरहेछु ।
मन भरी कुण्ठा र तिर्खाका ज्वारभाटाहरुसँग
लड्दै,उठ्दै म ......
जीवन खोजी रहेछु ,
हो म जीवन बांचेर हैन
जिएर हिंडिरहेछु ।

[यो प्रस्तुती कतै पुन प्रकासित गर्नु परेमा स्रोत खुलाएर वा लेखकको पुर्ण सहमतिमा मात्र प्रकासित गर्नुहुन अनुरोध छ । -सपनासंसार ]